اس دنیا میں کسی بھی کام کے لئے طاقت ، حرکت اور مشقت کی ضرورت ہوتی ہے- کام کو مکمل کرنا اوراسے بخوبی سر انجام دینا محنت کے زمرے میں آتا ہے-دنیا کی تمام تر خوبصورتی محنت اور مشقت کی وجہ سے ہی ہے- اس کائنات کا ایک ہی اصول ہے اور وہ محنت ہے، جس پر عمل کر کے انسان زندگی کے ہر شعبےمیں کامیاب و کامران ہو سکتا ہےاور اسے بے شمار فوائد ملتے ہیں-

الله نے فرمایا انسان کو وہی کچھ ملے گا جس کے لئے وہ محنت کرے گا. الله کے رسول حضرت محمّد بھی محنت کرنے  تاکید کرتے تھے- آپ نے فرمایا : "محنت کرنے والا اللّہ کا  دوست ہے " – حضور نبی کریم کی زندگی محنت سے کام کرنے کا  عملی نمونہ ہے- آپ اپنا ہر کام خود کرنے میں فخر محسوس کرتے تھے-اپنے جوتے خود مرمت کرتے ،پھٹے کپڑوں کو بھی خود پیوند لگا لیا کرتے تھے، غزوہ خندق میں آپ نے خندق کھودنے میں حصّہ لیا اور مسجد نبوی کی تعمیر میں بھی صحابہ اکرام کے شانہ بشانہ کام کیا-

کسی نے بھی محنت کے بغیر دنیا میں کچھ نہیں پایا نہ نام اور نہ دولت- دنیا میں نام پیدا کرنے کے لئے محنت اور مشقت کی ضرورت ہوتی ہے- ایک شاعر نے اسے کچھ یوں بیان کیا ہے:" سو بار جب عقیق کٹا تب سنگین ہوا" – ہیرا بھی سو بار کٹتا ہے تو تب وہ زیور میں استعمال ہونے کے لائق بنتا ہے- محنت کے بغیر انسان بھی کچھ حاصل نہیں کر سکتا اور وہ دوسروں کا محتاج ہو کے معاشرے  پر بوجھ بن جاتا ہے-

کسان کی مثال ہمارے سامنے ہے وہ صبح سویرے اٹھ کے کھیتوں میں جاتا ہے  اور پورا دن محنت مشقت کرتا ہے- وہ  محنت کرتا ہے تو اپنے اور ہمارے لئے روزی کا سامان پیدا کرتا ہے- اسی طرح طالب علم بھی محنت کرتا ہے تو وہ اعزاز کے ساتھ امتحان میں کامیاب ہوتا ہے اور پڑھائی کے بعد اپنے پیشے میں نام پیدا کرتا ہے- جو محنت نہیں کرتا کاہلی اسے لے ڈوبتی ہے-

 

مولانا الطاف حسین حالی نے فرمایا :

                                        "مشقت کی ذلت جنھوں نے اٹھائی

                                         جہاں میں ملی ان کو آخر بڑھائی

                                        کسی نے بغیر اس کے ہرگز نہ پائی

                                        فضیلت نہ عزت نہ فرمان روائی

                                        نہال اس گلستان میں جتنے بڑھے ہیں

                                       ہمیشہ وہ نیچے سے اوپر چڑھے ہیں" - .

کامیاب ہونے کے لئے محنت و مشقت اولین شرط ہے اور محنت میں ہی عظمت ہے-