نفسي .. نفسي .. نفسي في حاجات كتيره اوي ومنها اهمها او ممكن تقول دي علي راسها "نفسي احقق اللي انا نفسي فيه" ......
والحاجات اللي نفسي فيهم دول بساط اوي ، اي حد ممكن يكون بيتمناهم واقدر احققهم بنفسي وبساطه اوي بس مش عارفه ، انا فعلا نفسي احقق الحاجات دي ولا بكدب علي نفسي بجد مش عارفه ..
 

ومن اول الحاجات دي نفسي ابطل اغلط .. اه بجد نفسي ابطل اغلط .. نفسي ابعد عن المعصيه علي قد ما اقدر اللي بعملها في حق ديني وفي حق نفسي وحقيقي حاولت كتير ابعد وابطل بس برجع تاني لنفس الغلط مع اني ببقي متاكده اني توبت بجد من جوايا بس حقيقي هرجع واقول مش عارفه بس يمكن برجع تاني لنفس الغلط علشان بقول اني غلطي بسيط اووي وربنا مش هيعاقبني جامد زي ناس كتيره بتغلط بس بتكون غلطات جامده وساعات مش بتتغفر ، بس برجع الاقي نفسي بتساليني هل اللي بقوله ده صح ؟؟؟ ، او بمعني اصح هل اللي بقوله ده انا حساه او مقتنعه بيه من جوايا ؟؟؟ .. وطبعا بتكون الاجابه لا ، بحس بجد اني بكدب علي نفسي وبصدق الكدبه واديني عايشه وخلاص لحد ما اعرف اتخلص من كل الكلام ده ..

 

تاني حاجه نفسي احققها اوي اني اعمل كل حاجه نفسي فيها من غير عقاب ومن غير لوم من حد اعيش حياتي لنفسي وبس بدامي مش بغضب ربنا .. فيها ايه يعني لما اجري في الشارع تحت المطره ايه الحرام في كدا ؟؟؟؟؟ . فيها ايه يعني لما البس اللي انا عاوزه بدام ربنا هوه اللي هيحاسبني انت ليه بقي تلومني ؟؟؟؟ . فيها ايه لما اضحك في الشارع وامشي بالاسلوب اللي انا عاوزه انت مالك ؟؟؟؟ . فيها ايه يعني لما اعمل كل حاجه انا عاوزها بدون متفكرني كل شويه اني بنت طيب مهو انا عارفه مش محتاجه تفكير معاليك والله .. ليه مش تسبونا نعمل اللي نفسنا فيه بدون قيود واوامر من المجتمع ؟؟؟ ..

اما تالته حاجه نفسي فيها دي حلم اعتقد صعب التحقيق واعتقد ده مش حلمي لوحدي وهوه اني نفسي اتعامل كمواطنه في بلد ضاعت فيها كل المبادئ وكل الاخلاق وكل معاني الانسانيه ونفسي اتعامل كمرأه ليها حقوق مش من يوم ما تتولد تشوف القهر وسيطره الرجل والتخلف والجهل وكل حاجه لازم تعملها من غير نقاش .... نفسي نتعامل كنساء في عصر ضاع فيه الرجال ، عصر اصبح لا يحكمه غير التحرش والجهل وكل معاني السيطره علي حقوق المرأه ... بس اعتقد انه ده حلم بعيد اوي المنال بل مستحيل .....

واخيرا اتمني ان احب . احب كل شئ حياتي التي لم اختارها .. واقعي الذي فرض عليه .. الاشخاص الذي قررت ان اكمل معاهم بقيه حياتي .. احب ذاتي التي ستظل معي بقيه الحياه .. احب شخص واكمل معه بقيه حياتي .. اريد ان احب كل شئ لاني حبي للحياه برغم كل ما فيها سوف يجعلني لا اشعر بائ شئ .....