" لو ضاعت فتره في عمرك لسه الاحلي مجاش " .. دي جمله سمعتها مره في احدي اغنيات الديتو بين الفنانه اصاله والفنان رامي صبري ومن بعد ما سمعتها ويعتبر بينت حياتي كلها عليها ..

نقدر نقول ان الحياه دي عباره عن اوقات صعبه واوقات حلوه اوي والاتنين لازم نتعلم منهم ونستفاد مش بس نعيش اللحظه سواء كانت حلوه ونتبسط وننسي ، او سواء كانت وحشه ونعيش فيها ونكره حياتنا .. لا طبعا الحياه عمرها ما كانت كده ..

الحياه دي عباره عن تجربه كبيره اوي فيها كده وكده والاتنين لو الواحد فهمها صح هيقدر يتعامل مع الواقع ده وهيقدر ينجح في حياته ويعبر من اي محنه  بنجحاح وهيستفاد منها اوي وبرضو هيقدر ينبسبط من اي لحظه تعمر عليه ومش هينساها ابدا ..

هوه ده الانسان الصح اللي يقدر يتعامل مع الواقع اللي بقينا عايشين فيه ده .. وعلشان يقدر فعلا يتعامل لازم يعمل شويه حاجات وعلي راسها متزعلشي من حد ولا تزعل علي حاجه ، علشان كل ده تعب لنفسك انت وبس ، ليه تزعل نفسك علي شخص جرحك في يوم او ظلمك او جه عليك كبر دماغك ودي ضهرك ليه ولكل اللي هيتعبك اه والله ده الصح .. هتقولي صعب .. هقولك لا خالص الحياه ابسط من كدا بكتير بلاش تقعد تقول الشخص ده كان نفسي اكمل معاه بقيه حياتي ، والشخص ده فيه صفات عمري مهقدر الاقيها في حد تاني علشان ببساطه اللي خلق الشخص ده خلق غيره وبدام الشخص ده دخل حياتي صدفه وبسطني في فتره معينه ، فربنا قادر برضو يدخل شخص تاني حياتك في فتره معينه ويبسطك ودايما تفاؤل ان الحلو في حياتك لسه مجاش ..

تاني حاجه عيش ببساطه ، ومتقعدشي تفكر في مستقبلك اوي وتتعب نفسك بكل حاجه علشان ببساطه اللي ربنا كاتبه هوه اللي هيكون مهما تعمل ومهما تجري وتخطط ، في النهايه حكم ربنا هوه اللي هيحصل ، انت ببساطه بس حدد انت عاوز ايه وابدا اسعي ورا حلمك واعمل كل اللي عليك وسيب الباقي علي ربنا ...

بجد لازم مش نزعل علي حاجه فاتت ولازم دايما نستني الخير ونتمناه وبلاش نزعل ولو زعلنا ننسي ونعدي ونعيش وبلاش نشيل الهم ونفكر في اللي جاي علشان اكيد ربنا هيكون شايلينا الافضل بس احنا نصبر ونكبر ونفوت للناس ونعيش ببساطه