" الصحاب مش شويه وشوش _ الصحاب بقوا عمله نادره ما بيتلاقوش "
الصحاب مش مجرد اتنين ما بيفترقوش
مش مجرد اتنين بيسلو بعض عشان ما يخافوش
مش مجرد شله بيداروا علي مصايب بعض عشان ما يتقفشوش
الصحاب مش شويه وشوش
وناس عايشيين حياتهم تمام جدا ومابيتخانقوش
الصداقه ليها معني كبير بنكتشفهوش
غير مع ناس معينه وللاسف طبعا ما بيتقابلوش
اصل الصداقه مش بتتقاس بالكلمات
ومين الي قال للتاني كلام حلوه
ومين في التاني مات
الصداقه بتبان في المواقف الصعبه
وفي المحن اوقات
الصداقه بتبان في الخناقات
مين الي ساب التاني وعادي جدا بات
ومين الي فضل سهران مخنوق بالساعات
الصداقه برغم انها بتبان مواقف بسيطه
وحبه حاجات
بس النداله فيها بتكون جوانا بصمه ما بتتنسيش
وبيفضل جوانا حاجه مخنوقه ماتتحكيش
وبيفضل جوانا نقطه سوده مع الزمن ماتتمحيش
عمري ما اخترت صح في حياتي
مع اني مش ديما بكون انا الغلط
مش بلوم حد علي اختياراتي
ولا ببرر لنفسي غلطاتي
لاني في الاول والاخر انا بردو جزء من السبب
