ولو سيبتك ومشيت أروح فين
أروح فين وإنتي بيتي
أروح فين وإنتي معارفي
وسمعتي وصيتي
أروح فين وإنتي نهاري وليلي
وإنتي الضي في طريقي ودليلي
أروح فين وإنتي مشواري
أروح فين وإنتي جنتي وناري
أروح فين وإنتي في لوني وسماري
وأمشي
أمشي فين وانتي الطريق
دا أنتي بكرة والنهاردة
والأمس العتيق
وانتي فرحي وهناي
وبكايا في لحظة ضيق
وانتي النظرة في عين كل إنسان
وبسمة مرسومة ع الوشوش بحنان
دا أنتي الزمان وانتي المكان
ولو مشيت......مين غيرك
مين غيرك هيشوف ضعفي وقوتي
مين غيرك هيحس بوحدتي
مين غيرك يشيل عني الهموم
مين غيرك هقبل منه عتاب أو لوم
ومين غيرك هيعريني
من كبرياء أو غرور
أو لحظة عظمي تعتريني
وإوعديني
تبقي جنبي في دنيتي
وفي قبري جنبي
تخطفيني
من وحدتي
يارب من قلبي بقولها
وانت ادرى بنيتي
طلبي صغير
ومش عايز غيرة في أخرتي
أدخل جنتك
وانت عارف إن هيا
بالنسبة ليا
جنتي
