برسوں پرانی بات ہے، میں کراچی سے اپنے خاندان سمیت اپنے گاؤں منتقل ہوا. کراچی کا شہری ماحول مجھے اس وقت ہی اچھا لگتا جب تک میں گاؤں نہیں گیا. مگر جب ابّو نے فیصلہ کیا کہ کراچی کے حالات کے پیش نظر ہمیں گاؤں جانا چاہیے تو چاہ اور بڑھی. دل میں ہلچل تھی کہ آخر یہ گاؤں ہوتا کیسا ہے. وہاں کیسے انسان بستے ہیں. کراچی میں تو ہر انسان جیسے پرایا ہو، دنوں بلکہ ہفتے گزر جاتے تھے مگر نہ کسی سے سلام نہ دعا. لگتا تھا جیسے سب اپنے لیے جی رہے ہیں.                                                                                                                         ١٩٩٢ میں ہم گاؤں منتقل ہو گے. ابّو چونکہ کراچی میں ہی جاب کرتے تھے تو وہ نہیں آ سکے (وہ ٢ سال بعد گاؤں آے اسلام آباد ٹرانسفر کروا کر). جب میں گاؤں میں پہنچا تو یقین کریں دل باغ باغ سا ہو گیا ہو. صبح سویرے سوندھی سوندھی خوشبو، کچے پکے مکان اور پر خلوص لوگ - غرض کہ جو چیز کراچی میں نہیں تھی، وہ یہاں وافر مقدار میں دستیاب تھی. گاؤں کی سردیاں اور گرمیاں اپنے جوبن پر ہوتی ہیں. گرمیوں میں بچے اسکول سے واپس آ کر کھل کود میں مشغول ہو جایا کرتے تھے جب کہ والدین قیلولہ کیا کرتے. جب کہ سردیوں کے دنوں میں کمرے کے اندر آگ جلا کر ہاتھ تاپنے کا اپنا ہی مزہ ہوا کرتا تھا.                                                                                                                  پیسے اتنے نہیں ہوتے تھے مگر فکریں بھی ایسی نہیں ہوتی تھیں. شاید پیسا اپنے ساتھ فکریں اور پریشانیاں لاتا ہے، یا ہم پیسے کو سب کچھ سمجھنا شروع کر دیتے ہیں. اسی لیے آج بھی بے لوث محبّت گاؤں میں ہی ملتی ہے. مہمانوں کے آنے کو الله کی رحمت تصوّر کیا جاتا ہے نہ کہ بوجھ. گاؤں کی سب سے دلچسپ بات یہ ہے کہ یہاں آپ کو سب جاننے والے ہوتے ہیں. یہ لوگ آپ کے دکھ اور خوشی میں دل سے شریک ہوتے ہیں. یہ آپ کی دل سے مدد کرتے ہیں بغیر کسی لالچ کے. ان کی سادگی ہی اصل میں ان کا بڑا پن ہوتا ہے.           گاؤں میں ایک اور چیز خالص ملتی ہے اور وہ ہے آپ کی غذا. یہ غذا ٹیبل پر سجے ہوئے مرغ مسلّم سے کہیں صحت مند اور خالص ہوتی ہے. دودھ، مکھن کے پیڑے، ساگ (خاص طور پر سرسوں کا ساگ تو لا جواب ہوتا ہے )، مکئی کی روٹی اور لسی وغیرہ گاؤں کی ایسی سوغات ہیں کہ بندے کو بھوک کا احساس ہی نہیں دلاتیں کیونکہ ایک بار کھا کر بندا اچھی خاصی توانائی حاصل کر لیتا ہے.                                                                                                                      الغرض گاؤں کی زندگی کے کئی پہلو ہیں جو مجھے اس قسم کی زندگی گزارنے پر مجبور کرتے ہیں اور میں واقعی خوش قسمت ہوں کہ مجھے ایسی زندگی کا تجربہ ہوا. آپ اپنے کمنٹس میں بتائیں کہ آپ کو گاؤں کی زندگی کا تجربہ کیسا لگا.امید ہے آپ کو یہ تحریر اچھی لگی ہو گی اور آپ دوسروں سے ضرور شیر کریں گے!